Të paktën pesë persona kanë humbur jetën në Spanjë si pasojë e pasojave të rënda të shkaktuara nga ndërprerja masive e energjisë elektrike që përfshiu vendin dhe disa zona të Portugalisë e Francës jugore.
Tre anëtarë të një familjeje – një çift të moshuarish, 81 dhe 77 vjeç, si dhe djali i tyre 56-vjeçar – u gjetën të pajetë në shtëpinë e tyre për shkak të asfiksisë nga monoksidi i karbonit, i prodhuar nga një gjenerator i dëmtuar që ata po përdornin për furnizim alternativ me energji.
Një tjetër viktimë është raportuar në Valencia, ku një grua 46-vjeçare me aftësi të kufizuara, që vuante nga një sëmundje e mushkërive, ndërroi jetë pasi pajisja që e ndihmonte me oksigjen ndaloi së funksionuari për shkak të mungesës së rrymës.
Në Madrid, një tjetër grua 46-vjeçare humbi jetën nga një zjarr në banesën e saj, i cili dyshohet se u shkaktua nga një qiri i ndezur gjatë ndërprerjes së energjisë.
Energjia elektrike është rikthyer pothuajse plotësisht në Spanjë dhe Portugali që prej të martës, ndërsa situata po normalizohet edhe në rajone si Katalonja dhe Madridi, ku tashmë janë rikthyer në funksion edhe linjat hekurudhore.
Ndërprerja shkaktoi humbje të mëdha për sektorë të ndryshëm, sidomos për industrinë e bulmetit dhe mishit. Komisioni Evropian ka njoftuar se qeveria spanjolle ka afat tre muaj për të paraqitur një hetim të plotë mbi shkaqet e kësaj ndërprerjeje masive që alarmoi qytetarët dhe paralizoi përkohësisht vendin.
