"Rusia është e gatshme për bisedime paqeje me Kievin pa parakushte", kështu ka deklaruar presidenti rus, Vladimir Putin gjatë takimit me të dërguarin special të Shteteve të Bashkuara, Steve Witkoff.
Në një takim me të dërguarin special amerikan Steve Witkoff, presidenti rus Vladimir Putin ka thënë se "Rusia është e gatshme të rifillojë bisedimet me Kievin pa asnjë parakusht", sipas asaj që bën të ditur Kremlini, njofton agjencia Tass.
Putin: "Rajoni i Kurskut është çliruar plotësisht", por Kievi e mohon
Presidenti rus Vladimir Putin ka deklaruar se sulmi ukrainas në rajonin e Kurskut "ka dështuar plotësisht" dhe se i gjithë territori është çliruar.
Shefi i Shtabit të Përgjithshëm të forcave të armatosura ruse, gjenerali Valery Gerasimov, ka thënë se është "çliruar" vendbanimi i fundit që ndodhej ende nën kontrollin e forcave ukrainase, Gornal, sipas agjencisë Tass.
Gerasimov gjithashtu ka pranuar se gjatë çlirimit të rajonit të Kurskut, forcat koreano-veriore kanë ofruar "ndihmë të konsiderueshme", raporton agjencia Interfax.
Shtabi i Përgjithshëm i Ukrainës: Operacioni në Kursk vazhdon
"Forcat e armatosura të Ukrainës vazhdojnë operacionin mbrojtës në disa zona të rajonit të Kurskut. Situata operacionale mbetet e vështirë, por njësitë tona vazhdojnë të mbajnë pozicione të caktuara dhe të përmbushin detyrat e ngarkuara, duke i shkaktuar armikut humbje me të gjitha llojet e armëve dhe përmes taktikave të mbrojtjes aktive", thuhet në deklaratën e Shtabit të Përgjithshëm të Ukrainës, siç raportojnë mediat ukrainase, pas njoftimit të presidentit rus për çlirimin e plotë të Kurskut.
