SHBA-të po përgatiten t’i ofrojnë Arabisë Saudite një pako armatimi me vlerë mbi 100 miliardë dollarë, e cila pritet të shpallet gjatë një vizite të presidentit Donald Trump në mbretëri. Pakoja përfshin sisteme të avancuara ushtarake nga kompani amerikane si Lockheed Martin, RTX Corp (ish-Raytheon), Boeing, Northrop Grumman dhe General Atomics.
Ndërkohë, përpjekjet e administratës Biden për një marrëveshje mbrojtjeje me Riadin, të ndërlidhur me normalizimin e marrëdhënieve me Izraelin, nuk patën sukses. Biden kishte propozuar akses në teknologji ushtarake amerikane në këmbim të ndalimit të bashkëpunimit me Kinën. Ende nuk dihet nëse pakoja e re përfshin kushte të ngjashme.
Lockheed Martin pritet të furnizojë avionë C-130, raketa dhe radarë, ndërsa General Atomics ka në fokus një marrëveshje për dronët MQ-9B SeaGuardian. Marrëveshja thekson interesin e kompanive amerikane për të forcuar lidhjet me Arabinë Saudite përmes industrisë së mbrojtjes.
