Një ditë pasi Ilir Alimehmeti nuk e fshehu ambicien për të qenë kandidat i Partisë Demokratike për Bashkinë e Tiranës, në skenë ka dalë edhe një tjetër emër. Aktori dhe aktivisti Florjan Binaj ka deklaruar në Euronews Albania se është i gatshëm të jetë kandidat për kryeqytetin.
I pyetur nëse në skenarin më të keq do të hynte në garë si kandidat i pavarur dhe në skenarin më të mirë si pjesë e një fronti të bashkuar opozitar, Binaj u përgjigj shkurt: “Po”.
Ai e lidhi këtë vendim me bindjen se kushdo që mendon se mund të japë një kontribut për shoqërinë duhet të dalë nga komoditeti i komenteve dhe rrjeteve sociale. Sipas tij, Tirana nuk përmirësohet me “like”, me postime dhe me komente të tipit “bravo shefi”, por me veprim konkret.
Deklarata e Binajt vjen në një moment kur brenda opozitës ka nisur ende pa u shpallur zyrtarisht gara e emrave për Tiranën. Ilir Alimehmeti, një nga figurat që garoi edhe më herët në primaret e PD-së, ka lënë të kuptohet se e sheh veten sërish në këtë betejë. Tani listës i shtohet edhe Florjan Binaj, i cili prej kohësh është pozicionuar publikisht si zë kritik ndaj qeverisë dhe Bashkisë së Tiranës.
Me pak fjalë, Tirana ende nuk ka datë zgjedhjesh, por kandidatët potencialë kanë nisur të dalin njëri pas tjetrit. Opozita duket se është ende në fazën ku të gjithë matin pulsin, provojnë terrenin dhe presin të kuptojnë se kush do të marrë bekimin final.
Sepse, në fund, kush do të jetë kandidati i opozitës për Tiranën nuk e përcakton dot as Florjan Binaj, as Ilir Alimehmeti. Madje, me gjasë, nuk e përcaktojnë dot as demokratët. Atë emër, siç ndodh rëndom në PD, do ta vulosë Sali Berisha.
