Kreu i Partisë Demokratike, Sali Berisha, u nis sot drejt Shteteve të Bashkuara të Amerikës, ku ka paralajmëruar edhe një takim me shqiptarët që jetojnë atje.
Por duket se vizita e tij nuk do të shoqërohet vetëm me entuziazmin dhe duartrokitjet e mbështetësve. Në të njëjtën ditë, një grup emigrantësh shqiptarë ka paralajmëruar organizimin e një proteste kundër kreut të PD-së.
Përmes një postimi në Instagram, organizatorët kanë bërë publike thirrjen për tubim, duke përdorur një nga sloganet e protestës në Tiranë, “Berisha non-grata, Berisha në burg”.
Kështu, udhëtimi i parë i Berishës në SHBA pas heqjes së kufizimit për hyrjen e tij pritet të ketë dy pamje, nga njëra anë mbështetësit që do ta presin në sallë, ndërsa nga ana tjetër kundërshtarët që kanë zgjedhur protestën për t’i “uruar mirëseardhjen”.
Pak ditë më parë, kreu i demokratëve njoftoi se takimi me shqiptarët e Amerikës do të zhvillohet të dielën, më 6 shtator, në orën 11:00, në Bergen Performing Arts Center, në Englewood të New Jersey-t.
“Freedom Works” është slogani me të cilin Berisha ka promovuar takimin dhe ku pritet t’u drejtohet me një fjalim shqiptarëve të Amerikës.
Mbetet për t’u parë se cila pritje do të bëjë më shumë zhurmë më 6 shtator, ajo brenda sallës apo ajo e paralajmëruar jashtë saj.
