Nisma e re e kryeministrit Edi Rama për të detyruar deputetët e Partisë Socialiste të zbresin çdo të premte në orën 17:00 në terren për "Praninë Besnike" me qytetarët, ka nisur mes kaosit logjistik, mungesës së infrastrukturës dhe bojkotit nga figura të mazhorancës. Ditën e parë të nisjes zyrtare, ajo që duhej të ishte një urë lidhëse mes popullit dhe pushtetit ka nxjerrë në pah dështimin organizativ.
Siç ka mësuar VNA, pkërisht në ditën e inaugurimit, "sistemi magjik" digjital i premtuar nga Rama për përpunimin e ankesave nuk ka është gati. Në kushtet kur kryeministri u ka ndaluar rreptësisht (të paktën në parim) deputetëve t'u telefonojnë drejtorëve të institucioneve për zgjidhjen e halleve, zgjedhësve u duhet të përballen me deputetë që mbajnë thjesht shënime me laps e letër, pa asnjë garanci për zgjidhjen e problemeve të tyre.
Situata është kaotike nga lëvizjet e fundit politike dhe rishpërndarja e drejtuesve në qarqe, çka ka krijuar shkëputje mes deputetëve dhe zonave ku ata kanë marrë votat.
Banorët e Lezhës nuk do të mund të takojnë deputetin e tyre Ulsi Manja, pasi Rama e ka dërguar atë si drejtues politik në Dibër. Nga ana tjetër, as dibranët nuk kanë se me kë të flasin për mbajtje premtimesh, pasi Blendi Klosi, të cilit i dhanë besën me votë, është zhvendosur në Durrës.
Në Lezhë, përveç takimit të zakonshëm të paralajmëruar nga deputeti Admir Kadeli, drejtuesi i ri politik Ermal Nufi — i cili as nuk gëzon mandat deputeti — nuk ka dhënë asnjë qartësi nëse do të jetë vetë i pranishëm tek qytetarët.
I ngjashmi me të, Enea Karakaçi është akoma më keq. Ai nuk ka bërë fare asnjë njoftim për takimet e besës në Shkodër sot.
Me Marjana Koçekun që iku nga PS, me Benetin që nuk është më drejtues qarku, deputetët e tjerë Onid Bejleri dhe Xhenis Cela gjithashtu nuk kanë publikuar takime. Në Shkodër sot në 17:00 ka publikuar takime vetëm deputeti Bujar Rexha me Koplikun.
Benet Beci fërkon duart e vetë si ka shpallur asnjë kalendar. Fundja, se është as drejtues politik e as deputet.
Ish-kryeparlamentarja Elisa Spiropali duket se ka refuzuar prerazi pjesëmarrjen në këtë format takimesh. Emri i saj nuk figuron në asnjë kalendar takimesh dhe vetë ajo nuk ka bërë ndonjë njoftim për zgjedhësit, edhe pse prej kohësh ka një zyrë misterioze në ish-Bllok.
Ndërkaq, ish zëvendëskryeministrja Belinda Balluku ka preferuar të shpërndajë në rrjete sociale vetëm kalendarin e takimeve për "ushtarët" e saj në qarkun e Fierit, ndërsa vetë ka zgjedhur të mbetet jashtë listës së takimeve me popullin. Fundja, ka boll hallet e saj këto kohë!
