Një ngjarje e rëndë u shënua mbrëmjen e kaluar në fshatin Suk, në Roskovec. Rreth orës 22:30 të mbrëmjes së djeshme, 52-vjeçari Bledar Bakaj shkoi në shtëpinë e ish-vjehrrit Enver Gremaj dhe, pas një debati mes tyre, e plagosi me drapër.
Policia tha se 52-vjeçari ka thyer urdhrin e mbrojtjes të caktuar nga gjykata që të qëndronte larg bashkëjetueses së tij, vajzës së 67-vjeçarit. Por, pavarësisht këtij urdhri, ai shkoi në banesën e tyre dhe kreu krimin.
Autori i dyshuar i plagosjes, Bledar Bakaj, u kap pas 30 minutash, afër banesës së tij, në fshatin Mbërsh, Roskovec, ndërsa Gremaj ndodhet në spital, jashtë rrezikut për jetën. Ndaj të dyshuarit janë ngritur akuzat “Plagosja e rëndë me dashje” dhe “Veprime në kundërshtim me vendimin e Gjykatës”.
