Arrestimi i një shqiptari në Greqi, në kuadër të operacionit të koduar “Τα Άνθη του Κακού” — “Lulet e së keqes” — ka rikthyer në kronikën e zezë një nga emrat më të njohur të botës së krimit në Shqipërinë e viteve ’90: Lulzim Cakën, 56 vjeç, i njohur edhe me aliasin John Franko.
Operacioni u zhvillua më 9 shtator në zonën e Maratonës, pranë Athinës, pas informacioneve të përcjella nga DEA amerikane në Athinë. Mediat greke raportojnë se autoritetet zbuluan një skemë trafiku kokaine nga Kolumbia drejt Greqisë, ku droga fshihej brenda ngarkesave me trëndafila.
Sipas raportimeve greke, ngarkesa përbëhej nga 80 kuti me trëndafila të ardhur nga Bogota. Në 15 prej tyre, koka e lules ishte e vërtetë, por kërcejtë ishin plastikë dhe brenda tyre ishte fshehur kokaina. Në total, autoritetet sekuestruan 84 kilogramë kokainë, ndërsa hetimet zbuluan se grupi kishte kryer disa importe të ngjashme gjatë muajve të fundit, përmes një kompanie që dyshohet se ishte përdorur si fasadë për aktivitetin kriminal. Operacioni u raportua gjerësisht nga mediat greke, ndërsa News247 shkruan se hetimet u zhvilluan pas informacioneve të DEA-s dhe nga strukturat e DEOS pranë autoriteteve tatimore greke.
Në vilën ku jetonte Caka në Maratonë, ai u arrestua bashkë me të birin. Gjatë kontrollit, sipas raportimeve, u gjetën rreth 2 kilogramë kokainë, pajisje paketimi, kimikate, një pistoletë e fshehur poshtë barit sintetik dhe një makinë luksoze. Disa media shqiptare kanë raportuar edhe për 2 milionë euro cash dhe bizhuteri të gjetura në banesë, por kjo shifër nuk rezulton e konfirmuar në raportimet kryesore greke.
Zhvillimi më i fundit erdhi më 12 shtator, kur autoritetet greke gjetën edhe 26.8 kilogramë kokainë të tjera në një objekt në ndërtim pranë vilës. Sipas News247, droga ishte fshehur në një hapësirë nëntokësore dhe në një depozitë uji, ndërsa ishte paketuar në pllaka, gati për shpërndarje. Në të njëjtin vend u gjetën edhe fishekë të kalibrave të ndryshëm dhe një thikë. Autoritetet greke thanë se paketimet mbanin të njëjtën shenjë si presat dhe kallëpet e sekuestruara në operacionin e parë, çka i lidhte me të njëjtin rrjet.
Emri i Lulzim Cakës u zbardh fillimisht nga mediat shqiptare. Ai është një nga figurat më të njohura të krimit në zonën Berat–Fier–Lushnjë gjatë viteve 1995–2000. Caka është dënuar në Shqipëri me 25 vite burg për vrasje dhe ngjarje të tjera kriminale, ndërsa në vitin 2003 ishte ekstraduar nga Italia. Në vitin 2019 u lirua pas rreth 16 vitesh burg, një lirim që më pas u cilësua problematik dhe solli shkarkime në sistemin penitenciar.
Pas lirimit, Caka u shpall sërish në kërkim nga autoritetet shqiptare. Në vitin 2022, Greqia refuzoi ekstradimin e tij drejt Shqipërisë. Në territorin grek, sipas raportimeve shqiptare, ai jetonte me identitetin John Franko.
Historia e tij kriminale lidhet edhe me një nga episodet më të rënda të kronikës së zezë së fundviteve ’90: rrëmbimin dhe vrasjen e nënës së tij, Xhevrie Caka, në vitin 1999, pasi ajo e kishte vizituar në burg. Ky episod e rëndoi edhe më shumë emrin e tij në dosjet e krimit shqiptar të asaj kohe.
Tashmë Caka ndodhet në paraburgim në Greqi, bashkë me të birin. Hetimet greke janë përqendruar jo vetëm te ngarkesa e kapur me trëndafila, por edhe te importet e mëparshme nga Kolumbia. Dyshohet se jo të gjitha dërgesat kanë qenë “testime” të skemës, por pjesë e një trafiku të mirëorganizuar kokaine.
