Sipas të dhënave më të fundit të INSTAT, për periudhën janar–korrik 2026, në rang vendi janë regjistruar 844 aksidente rrugore, kundrejt 767 aksidenteve në të njëjtën periudhë të vitit 2025, duke shënuar një rritje me 10%.
Si pasojë e këtyre aksidenteve, gjatë kësaj periudhe janë regjistruar 1,187 persona të vrarë ose të plagosur, kundrejt 1,077 personave një vit më parë. Pra, kemi 110 viktima dhe të plagosur më shumë, ose një rritje prej 10,2%.
Edhe më shqetësues është muaji korrik 2026, gjatë të cilit janë regjistruar 165 aksidente, kundrejt 131 në korrik 2025, ose 26% më shumë. Numri i personave të vrarë ose të plagosur arriti në 235, kundrejt 194 një vit më parë, duke shënuar një rritje prej 21%.
Këto nuk janë thjesht shifra. Pas tyre janë fëmijë, të rinj, vajza e djem, nëna e baballarë, gjyshe e gjyshër. Janë familje që kanë humbur njerëzit e tyre dhe të tjerë që do të mbajnë gjatë pasojat e aksidenteve.
Sot, Drejtori i Përgjithshëm i Policisë së Shtetit, Skënder Hitaj, doli publikisht për të folur për masat e sigurisë në shkolla. Siguria e fëmijëve në shkolla është pa diskutim një prioritet. Por pikërisht për këtë arsye lind një pyetje po aq e rëndësishme: po për sigurinë e tyre në rrugë, kush jep llogari?
Një fëmijë duhet së pari të arrijë i sigurt në shkollë dhe të kthehet i sigurt në shtëpi. Prandaj, siguria në shkolla nuk mund të ndahet nga siguria rrugore.
Në kushtet kur statistikat zyrtare tregojnë rritje të aksidenteve dhe të numrit të personave të vrarë ose të plagosur, është e nevojshme që drejtuesit e Policisë së Shtetit të japin një analizë publike për këtë situatë dhe për efektivitetin e politikave të ndjekura në kontrollin e trafikut.
Në këtë kontekst duhet analizuar edhe qëndrimi i mëparshëm publik i Drejtorit të Përgjithshëm lidhur me kufizimin e ndalimeve të automjeteve nga Policia Rrugore. Nëse pas zbatimit të një politike të tillë treguesit e sigurisë rrugore përkeqësohen, atëherë është detyrim institucional të vlerësohet nëse kjo qasje ka ndikuar apo jo në uljen e kontrollit dhe të efektit parandalues në rrugë.
Lidhja shkakësore nuk duhet paragjykuar, por duhet analizuar dhe shpjeguar me të dhëna.
Sepse përgjegjësia nuk është vetëm të deklarosh masa të reja. Përgjegjësia është edhe të analizosh rezultatet e vendimeve të marra, të korrigjosh politikat kur ato nuk funksionojnë dhe, mbi të gjitha, të japësh llogari për jetët që humbasin në rrugët e Shqipërisë.
Siguria në shkolla fillon nga siguria në rrugë. Dhe kur shifrat rriten, heshtja nuk mund të jetë përgjigjja.
