Autoritetet greke vijojnë të mbajnë larg publikut identitetet e personave të arrestuar në kuadër të operacionit për goditjen e një grupi të dyshuar për trafikimin e kokainës nga Kolumbia drejt Greqisë, ku pjesa më e madhe e të arrestuarve raportohet se janë shqiptarë.
Mediat greke i kanë kushtuar një artikull të posaçëm operacionit, ku në total u sekuestruan 84 kilogramë kokainë të fshehur në një ngarkesë me trëndafila. Sipas Zougla, për çështjen janë arrestuar gjashtë persona, mes të cilëve një shtetas i huaj i akuzuar për vrasje dhe djali i tij.
Pikërisht identiteti i këtij personi mbetet një nga pikëpyetjet kryesore të operacionit. Deri tani autoritetet greke nuk kanë bërë publik emrin e tij, ndërsa informacionet e siguruara flasin për një person të kërkuar nga autoritetet shqiptare për një vrasje në Shqipëri. Bashkë me të është arrestuar edhe djali i tij.
Burime tepër konfidenciale bëjnë me dije se një prej personave të arrestuar është emër i njohur në qarqet e biznesit në Shqipëri. Ndërkohë, një tjetër shqiptar dyshohet se shërbente si lidhje e grupit me rrjetet e narkotrafikut në Kolumbi.
Skema e trafikimit ishte ndërtuar përmes një kompanie të krijuar në vitin 2023, e cila përdorej për importimin e trëndafilave. Hetuesit dyshojnë se aktiviteti real i kompanisë nuk përputhej me tregtinë e deklaruar dhe se gjatë tetë muajve të mëparshëm ishin realizuar disa dërgesa të tjera nga Kolumbia drejt Greqisë.
Ngarkesat nuk ndiqnin një itinerar të drejtpërdrejtë Kolumbi–Greqi. Ato kalonin fillimisht nga Kanadaja, ku pajiseshin me dokumentacion të ri transporti, përpara se të mbërrinin në Greqi. Si destinacion figuronte një dyqan lulesh në Artemidha, për të cilin hetuesit dyshojnë se ishte ngritur vetëm si fasadë për aktivitetin.
Ngarkesa e fundit përbëhej nga 80 kuti me trëndafila. Në 15 prej tyre, autoritetet greke zbuluan se lulet kishin kërcell artificial, brenda të cilit ishte fshehur kokaina. Në total u sekuestruan 84 kilogramë lëndë narkotike.
Hetimi i çoi autoritetet edhe në një vilë të marrë me qira në zonën e Marathonës, ku dyshohet se qëndronin persona me rol kyç në grup. Gjatë kontrollit u gjetën rreth 2 kilogramë kokainë, një armë zjarri, si dhe mbetje të kërcejve plastikë të përdorur për fshehjen e drogës. Sipas hetuesve, këto gjetje përforcojnë dyshimet se vila ishte përdorur për ruajtjen dhe përpunimin e sasive të kokainës të importuara më herët.
Në operacion morën pjesë strukturat greke kundër krimit të organizuar, ndërsa informacionet fillestare për ngarkesën kishin ardhur nga zyra e DEA-s amerikane në Athinë.
Mbrojtjen e katër prej të arrestuarve e ka marrë përsipër avokati i njohur penalist Sakis Kechagioglou, ndërsa në çështje është përfshirë si avokat mbrojtës edhe Manolis Vamvounakis.
