Një administratore dhe një magazinier. Kaq punonjës deklaron kompania Advanced Arms Technology, për të cilën ministri i Mbrojtjes, Ermal Nufi, shprehej se prodhon armë që shkojnë deri në zona konflikti.
Gjatë një interpelance në Kuvend, në prill të këtij viti Nufi deklaroi se AAT prodhon armë në Shqipëri dhe se këto të fundit janë tashmë në përdorim në konflikte jashtë vendit.
Por numri i punonjësve të deklaruar ngre pikëpyetje mbi aktivitetin që ministri i atribuoi kompanisë. AAT rezulton me vetëm dy të punësuar, administratoren Arjeta Puca dhe magazinierin Serxhio Gj.
Pra, një “industri” armësh që, të paktën në letra, funksionon me një staf prej dy personash.
Çështja merr një tjetër dimension pas përgjimeve të publikuara nga Arben Ahmetaj, ku aksioneri i AAT, Ron Yeffet, pretendohet se flet për importimin e armëve dhe municioneve nga Sudani dhe paketimin e tyre në Shqipëri.
Pikërisht këtu lind pyetja që kërkon përgjigje, çfarë aktiviteti ka kryer realisht AAT? Nëse kompania ka prodhuar, importuar apo eksportuar armë dhe municione, dokumentacioni doganor duhet të tregojë origjinën dhe destinacionin e tyre.
Në të kundërt, mbetet për t’u sqaruar deklarata e ministrit se ku u gjetën armët e prodhuara nga AAT, dhe që sipas tij po përdoren në zona konflikti.
