Protesta e zhvilluar këtë të shtunë në Vlorë kundër ndërtimit të Muzeut Hebraik Shqiptar është shoqëruar me tensione mes protestuesve dhe forcave të policisë.
Protestuesit kanë tentuar të hyjnë në kantierin ku po zhvillohen punimet, në zonën historike të qytetit, por janë ndaluar nga efektivët e policisë.
Ata kërkojnë ndalimin e projektit, me pretendimin se muzeu po ndërtohet në godinën e Klubit Patriotik “Labëria”, të cilën e konsiderojnë pjesë të rëndësishme të historisë dhe identitetit të Vlorës.
Prej disa ditësh, projekti për Muzeun Hebraik Shqiptar është vendosur në qendër të debatit, pikërisht për shkak të pretendimeve se punimet prekin godinën historike të Klubit “Labëria”.
Megjithatë, dokumentet e projektit dhe aktet e Këshillit Bashkiak të Vlorës tregojnë se bëhet fjalë për dy ndërtesa të ndryshme.
Sipas autoriteteve lokale, Muzeu Hebraik po ndërtohet në një banesë që daton në vitet 1850 dhe që ndodhet disa metra në lindje të Muzeut Etnografik. Në dokumentacion ajo identifikohet si “Banesa pranë Klubit Labëria”.
Dokumentet e Këshillit Bashkiak parashikojnë gjithashtu ndërtimin e një kati nëntokësor në godinën e Muzeut Hebraik dhe përforcimin e themeleve të Muzeut Etnografik gjatë punimeve, por jo ndryshimin e funksionit të godinës historike të Klubit Patriotik “Labëria”.
Në qendër të debatit duket se qëndron pikërisht emërtimi “Banesa pranë Klubit Labëria”, i cili është interpretuar nga një pjesë e kundërshtarëve të projektit si ndërtim i muzeut “te Klubi Labëria”. Dokumentacioni zyrtar, ndërkohë, i identifikon ato si godina të ndryshme.
