Avokatët vijojnë bojkotin duke mos marrë pjesë në proceset gjyqësore në Gjykatën e Posaçme, për shkak të rregullores së miratuar nga Erion Bani, që mbrojtësit ligjorë pretendojnë se i pengon në punën e tyre.
Këtë të hënë, trupa gjykuese që shqyrton dosjen Partizani, me të pandehur kryesor për korrupsion ish-kryeministrin Sali Berisha, u detyrua të shtynte seancën për një datë tjetër, për shkak të mungesës së avokatëve. Mbrojtësit ligjorë kishin dërguar në GJKKO kërkesë për shtyrje, duke e përligjur me vendimin e Dhomës së Avokatisë së Shqipërisë, që ka vendosur të bojkotohen proceset derisa të reflektohet.
Avokatët kundërshtojnë faktin se janë të detyruar të hyjnë pa celular në sallën e gjyqit. Në procesin Partizani, prokurorja e posaçme Enkelejda Millonai ishte e papajisur me celular, ndërsa, për ironi të fatit, telefonët i kishin 3 anëtarët e trupës gjykuese.
Në seancë ishte planifikuar të dëshmonte gjeneral Vladimir Qirjazi, një nga provat kyçe kundër Berishës dhe të pandehurve të tjerë, por, për shkak të shtyrjes, ai pritet të paraqitet seancën e radhës. Ndërkohë që ditën e sotme, po për shkak të bojkotit të avokatëve, u shtynë edhe disa procese të tjera. Rregullorja e miratuar nga GJKKO u godit në Gjykatën Kushtetuese nga AGSH.
