Alket Rizai, shqiptari i njohur në Greqi si ish-bashkëpunëtor i Vasilis Paleokostas dhe i arratisur dy herë me helikopter nga burgu, është përfshirë sërish në një ngjarje të rëndë kriminale, këtë herë jashtë një beach bar-i në Anavyssos të Athinës.
Incidenti ndodhi në orët e para të mëngjesit të së dielës, rreth orës 05:15, jashtë lokalit në zonën bregdetare. Fillimisht policia gjeti në vendngjarje gëzhoja dhe gjurmë gjaku, ndërsa vetëm më vonë, pas analizimit të pamjeve të kamerave të sigurisë së lokalit, u identifikua mes personave të përfshirë edhe Alket Rizai.
Sipas raportimeve të mediave greke, Rizai ndodhej jashtë burgut me leje të rregullt nga burgu i Domokos. Pra, nuk bëhej fjalë për lirimin e tij, por për një leje të përkohshme, me detyrimin për t’u rikthyer mëngjesin e së hënës, 14 shtator.
Ngjarja dyshohet se nisi pas një konflikti për muzikën. Rizai kishte shkuar në beach bar me dy persona të tjerë. Kur lokali mbylli muzikën për shkak të orës së vonë, grupi dyshohet se ka vendosur muzikë me zë të lartë në parking, duke sjellë ndërhyrjen e pronarit të lokalit. Debati u përshkallëzua shpejt.
Sipas të dhënave të publikuara nga mediat greke, Rizai dyshohet se nxori armë dhe qëlloi në ajër. Më pas, një shtetas afgan, i lidhur me sigurinë e lokalit, dyshohet se qëlloi në drejtim të tij. Nga të shtënat mbetën të plagosur dy punonjës të lokalit, një 20-vjeçar grek dhe një 41-vjeçar pakistanez. Plagosjet, sipas raportimeve paraprake, kanë ardhur nga rikosheti i plumbave dhe jo nga një shënjestër e drejtpërdrejtë ndaj tyre.
Pas incidentit, Rizai dhe dy personat që e shoqëronin u larguan nga vendi i ngjarjes. Identifikimi i tij erdhi vetëm pasdite, kur policia arriti të analizonte pamjet filmike të lokalit.
Ngjarja ka vënë në alarm autoritetet greke, pasi Rizai ishte ende i dënuar dhe ndodhej jashtë qelisë vetëm për shkak të lejes së përkohshme nga burgu. Tashmë hetimet janë përqendruar jo vetëm te të shtënat në Anavyssos, por edhe te mënyra se si një i dënuar me profil kaq të lartë u gjend i përfshirë në një përplasje të armatosur gjatë kohës që duhej të ishte nën kontrollin e regjimit të lejes.
