Debati për protestat kundër projektit të Zvërnecit është shoqëruar edhe me një përplasje verbale mes Gent Strazimirit dhe Redi Muçit, ku në qendër të diskutimit u vendosën akuzat për marksizëm dhe leninizëm.
Strazimiri ironizoi aktivistët e Lëvizjes Bashkë, duke i cilësuar si “marksistë-leninistë” dhe “komunistë jashtë kohe”, ndërsa pretendoi se prania e tyre dhe sloganet politike kanë larguar një pjesë të qytetarëve nga protesta. Ai u ndal veçanërisht te pankartat me mesazhin “Rama dhe Berisha njësoj në burg”, duke argumentuar se protesta duhet të mbetet qytetare dhe jo politike.
Përgjigjja e Redi Muçit ishte e menjëhershme. Ai kundërshtoi etiketimet si marksist apo leninist, duke deklaruar se brezi i ri që merr pjesë në protesta nuk identifikohet me këto ideologji. Sipas tij, të rinjtë që protestojnë janë rritur duke parë në politikë Edi Ramën dhe Sali Berishën dhe dalin në shesh për të kërkuar llogari ndaj klasës politike që ka qeverisur vendin gjatë 35 viteve të fundit.
Shkëmbimi i akuzave vjen në një moment kur protestat për Zvërnecin po tërheqin pjesëmarrës nga grupe dhe bindje të ndryshme politike, ndërsa debati për drejtimin dhe përfaqësimin e tyre mbetet i hapur.
