Protesta e qytetarëve kundër projektit të Zvërnecit ka vijuar dhe këtë të mërkurë. Protestuesit janë mbledhur sërish tek sheshi Skënderbej, por ndryshe nga ditët e tjera janë përplasur me policinë.
Një gardh metalik dhe forca të shumta policie kanë tentuar të bllokojnë marshimin e tyre drejt kryeministrisë. Pas përplasjeve, qytetarët kanë mundur të ccajnë kordonin e policisë duke i detyruar uniformat blu që të tërhiqen bashkë me makinat e ujit.
Protesta më pas është zhvendosur para kryeministrisë, me thirrjet ‘Hiqni kapelet’ për policinë, ‘Jep dorëheqjen’, ‘Opozitë e shitur’, ‘Rama burg, Berisha burg’.
Një nga protestuesit sapo ka nisur protesta i ka kërkuar të pranishmëve të mos provokohen.
Me pankarta të ndryshme në duar, ku në qendër të tyre vijon të jetë dyshja e politikës Edi Rama dhe Sali Berisha.
Por reagimi mesa duket nuk ka mbetur vetëm në Tiranë. Qytetarët kanë dalë në protestë dhe në Vlorë dhe Durrës ndërkohë që të shtunën në orën 10.00 është lajmëruar një protestë e madhe ku janë ftuar qytetarët nga e gjithë Shqipëria përpara kryeministrisë.
