Socialistët ia kanë lënë në derë SPAK-ut çështjen e djegies së karrigeve në seancën plenare të Kuvendit. Në një lëvizje që nuk përputhet me staturën e tij, ministri Ervin Hoxha e ka referuar çështjen në SPAK, duke renditur shkeljet e deputetëve. Me orientim të qartë nga kryeministri, ministri i Brendshëm tashmë ia ka deleguar çështjen Prokurorisë së Posaçme, duke e konsideruar këtë institucion si të vetmin që mund t'i vërë përpara përgjegjësisë deputetët e opozitës për atë që ndodhi mbrëmë në Parlament.
Mesa duket, muajit të mjaltit mes mazhorancës dhe opozitës i ka ardhur fundi për të disatën herë në 12 vitet e fundit. PS dhe PD, vetëm pak muaj më parë, u bashkuan për të votuar amnistinë penale, ku përfituan padrejtësisht edhe të dënuarit nga Gjykata e Posaçme. Edhe pse e mohuan në deklaratat politike, kreu i SPAK, Altin Dumani, në raportin vjetor të paraqitur në Parlament, renditi shumë emra ish-zyrtarësh të dënuar me akuzat e korrupsionit, të cilët përfituan nga amnistia Manja-Bardhi. Aleanca kundër SPAK lulëzoi për pak javë, për t'i lënë vendin denoncimit të sotëm.
Lëvizja e fundit hileqare e PS-së është përdorimi i SPAK-ut për të "larë hesapet" me ata që dogjën mbrëmë karriget. Por ky duket të jetë problemi më i vogël, për sa kohë tenderi për zëvendësimin e tyre mund të ketë nisur. Problemi mbetet mënyra se si SPAK do të qaset ndaj kësaj përpjekjeje politike për ta përdorur një nga institucionet e pakta të drejtësisë me reputacion të lartë si mjet nga mazhoranca e Edi Ramës.
