Kreu i lëvizjes “Shqipëria Bëhet”, Adriatik Lapaj, është përplasur verbalisht me deputetin e Partisë Demokratike, Bledion Nallbati, gjatë emisionit “5 Pyetjet nga Babaramo”. Nallbati e sfidoi Lapajn duke e pyetur se me çfarë burimesh financiare mbulon takimet e lëvizjes së tij.
“Me çfarë lekësh i financon takimet?” – ishte pyetja direkte e Nallbatit.
Nga ana tjetër, Lapaj u kundërpërgjigj duke ngritur pikëpyetje për financimet e Partisë Demokratike. Ai pyeti se ku gjen PD-ja fonde për të paguar çdo ditë 500 euro për ekranin LED poshtë ballkonit të Berishës, për transportimin e simpatizantëve me autobusë, apo për makinat luksoze që përdorin.
“Paguani çdo ditë ekranin LED, si i bëni lekët për këto?” – pyeti Lapaj, duke e kthyer debatin në një sulm ndaj shpenzimeve të opozitës.
Gjatë debatit, Lapaj ftoi publikun që të dhurojë për lëvizjen “Shqipëria Bëhet” në faqen e internetit të saj, duke përmendur edhe një donacion të bërë drejtpërdrejt gjatë emisionit.
“Nuk është ky emision për të mbledhur fonde,” ndërhyri gazetari Ilir Babaramo, duke kërkuar të rivendosë fokusin e debatit.
Nallbati, duke vazhduar debatin, e sfidoi Lapajn të bëjë një përmbledhje të fondeve të mbledhura deri tani për të parë transparencën financiare të lëvizjes.
Adriatik Lapaj: Dilni thoni ku i gjeni lekët, që ka 200 ditë aty te rruga dhe mbahet një ekran led që kushton 500 euro në ditë. Dilni ju tregoni ku i gjeni lekët me sjell njerëzit me autobusë në bulevard. Ku i gjeni lekët që lëvizni me makina të tipit të fundit. Bëni dhe ju transparencë si unë.
Bledion Nallbati: Ky zotëria që na tregon ne ku i gjejmë lekët. PD është një parti që në ditën më të zezë ka marrë 500 mijë vota. E pse e pyeta, se unë e di mirë ca kostosh që kanë takimet.
