Ish-futbollisti i Kombëtares shqiptare, Igli Tare, është vënë zyrtarisht nën hetim nga SPAK, në kuadër të një procedimi që lidhet me dosjen ndaj ish-zëvendëskryeministres dhe ish-ministres së Infrastrukturës dhe Energjisë, Belinda Balluku.
Burime për VNA bëjnë me dije se Tares i është komunikuar akuza e pastrimit të parave gjatë paradites së kësaj të enjteje, pasi ai u paraqit në ambientet e SPAK-ut pas fletëthirrjes së dërguar nga organi i akuzës.
Sipas burimeve, hetimi ndaj ish-futbollistit po zhvillohet në kuadër të verifikimeve që SPAK po kryen për çështjen e lidhur me Belinda Ballukun. Kjo e fundit po hetohet për shkelje të barazisë në tendera lidhur me projektin e tunelit të Llogarasë, ndërsa nën hetim janë edhe disa procedura që lidhen me lotët e Unazës së Madhe.
Paralelisht, Prokuroria e Posaçme ka nisur edhe një hetim pasuror ndaj Ballukut, me fokus verifikimin e pasurive dhe transaksioneve financiare.
Hetimet për këtë çështje vijojnë, ndërsa SPAK nuk ka dhënë ende detaje të tjera zyrtare mbi rolin e mundshëm të personave të përfshirë në procedim.
