Pa kaluar ende 24 orë nga vendosja e masës së sekuestros, Prokuroria e Posaçme ka bërë prapaktheu duke liruar llogaritë bankare të kompanisë së vëllezërve miliarderë nga Katari, Ramez dhe Mohamad Al-Khayyat, të angazhuar në projektin turistik të Zvërnecit.
Llogaritë ishin bllokuar në kuadër të një hetimi që lidhet me dyshimet për tjetërsimin e pronave në zonën e Nartës dhe Zvërnecit, një nga çështjet më të debatueshme të viteve të fundit. Burime bëjnë me dije se vendimi për lirimin e llogarive është marrë për të shmangur një përballje të mundshme ligjore në Gjykatën e Arbitrazhit, ndërsa hetimet për çështjet e pronësisë vijojnë. Sipas të njëjtave burime, bëhet fjalë për një dosje voluminoze që përfshin dokumentacion të konsiderueshëm mbi historikun e pronave në këtë zonë.
Zhvillimi vjen vetëm një ditë pasi kryeministri Edi Rama deklaroi publikisht se investitorët e huaj nuk duhet të pengohen nga hetimet dhe se çështjet e pronësisë duhet të trajtohen veçmas nga investimi. Edhe pse nuk pati një referencë të drejtpërdrejtë ndaj masës së sekuestros, deklaratat e kryeministrit u interpretuan gjerësisht si një mesazh për institucionet që po hetojnë çështjen.
Megjithatë, elementi më i pazakontë në gjithë këtë histori mbetet heshtja e plotë e SPAK-ut. Ndonëse sekuestroja është firmosur që ditën e premte dhe tashmë është hequr, deri në këto momente nuk ekziston asnjë njoftim zyrtar as për vendosjen e saj dhe as për lirimin e mëvonshëm të llogarive bankare.
Kjo ka krijuar një situatë paradoksale ku publiku informohet përmes burimeve jozyrtare për një nga çështjet me interesin më të lartë publik të viteve të fundit, ndërsa institucioni që ka marrë vendimet vazhdon të mbajë një mur të plotë heshtjeje. Në një kohë kur debati për Nartën dhe Zvërnecin ka nxitur protesta qytetare, përplasje politike dhe interes të jashtëzakonshëm mediatik, mungesa e transparencës nga SPAK rrezikon të prodhojë më shumë pikëpyetje sesa përgjigje.
Në fund, çështja nuk lidhet vetëm me lirimin apo bllokimin e disa llogarive bankare. Ajo lidhet me të drejtën e publikut për të kuptuar se çfarë po ndodh me një hetim që prek pronën, investimet strategjike, interesin kombëtar dhe një prej projekteve më të mëdha turistike të planifikuara ndonjëherë në bregdetin shqiptar. Dhe pikërisht për këtë arsye, heshtja e SPAK-ut po bëhet po aq lajm sa vetë vendimet që ai po merr.
