Pas Geraldo Bibës, pronarit në hije të Major Security, policia arreston dy punonjësit e tjerë që tërhoqën zvarrë një protestues në Zvërnec. Incidenti u shoqërua me protesta të forta.
Vlorë
Vijojnë hetimet intensive në bashkëpunim me Prokurorinë e Vlorës për të nxjerrë përpara përgjegjësisë penale të gjithë autorët e veprimeve ose mosveprimeve të kundërligjshme të kryera gjatë tubimit të zhvilluar më datë 30.05.2026, në Portonovë, Zvërnec.
Ndalohen dhe vihen në pranga 2 shtetasit që tërhoqën me forcë pjesëmarrësin në tubim.
Në vijim të veprimeve hetimore dhe procedurale për zbardhjen dhe dokumentimin e të gjitha rrethanave dhe përgjegjësive për këtë ngjarje, shërbimet e Drejtorisë Vendore të Policisë Vlorë, në bashkëpunim me shërbimet e Drejtorisë Vendore të Policisë Tiranë, kapën dhe ndaluan shtetasit A. G., 35 vjeç, dhe G. V., 41 vjeç, banues në Tiranë, pasi Gjykata e Vlorës u ka caktuar masën e sigurisë “Arrest në burg”, për veprën penale “Heqja e paligjshme e lirisë”.
Të dy akuzohen se, në bashkëpunim me shtetasin G. B. (i arrestuar më herët), kanë tërhequr me forcë drejt vendit të rezervuar për rojet pjesëmarrësin në tubim, shtetasin E. S., të cilit i kanë shkaktuar dëmtime trupore.
Më tej, nga verifikimet rezultoi se shtetasit e ndaluar, A. G. dhe G. V., nuk figurojnë të regjistruar apo të licencuar nga asnjë subjekt për shërbim privat të sigurisë fizike.
Materialet procedurale iu referuan Prokurorisë së Vlorës për veprime të mëtejshme.
