Një aksident i rëndë rrugor i ndodhur në orët e para të mëngjesit në Lushnjë ka rezultuar me humbjen e jetës së një 43-vjeçari.
Viktima është Ernis Xhumari, i cili ka humbur jetën në vendngjarje pas përplasjes së automjetit që drejtonte në rrethrrotullimin e Plasmasit.
Sipas informacioneve paraprake, automjeti tip “Benz” po lëvizte me shpejtësi të lartë kur ka goditur bordurën e rrethrrotullimit. Si pasojë e goditjes, mjeti është përplasur më pas me një shtyllë ndriçimi dhe ka përfunduar dhjetëra metra larg vendit të impaktit.
Për shkak të forcës së madhe të përplasjes, 43-vjeçari ka ndërruar jetë menjëherë.
Në vendngjarje kanë mbërritur shërbimet e Policisë Rrugore, të cilat kanë kryer veprimet procedurale dhe po punojnë për zbardhjen e plotë të rrethanave të aksidentit. Gjithashtu, ekipet zjarrfikëse kanë ndërhyrë për pastrimin e rrugës nga mbetjet e automjetit të shkatërruar.
