Drejtori i Përgjithshëm i Policisë së Shtetit, Skënder Hita, ka dënuar ashpër reagimin e Policisë së Vlorës gjatë protestës së zhvilluar dy ditë më parë në Zvërnec, ku një qytetar u dhunua dhe u tërhoq zvarrë nga punonjës të një kompanie private sigurie.
Në një konferencë për mediat nga Vlora, Hita deklaroi se përgjegjësia për menaxhimin e situatës bie mbi strukturat vendore të policisë, duke e cilësuar sjelljen e tyre si të papranueshme.
“Policia u shfaq e fjetur dhe jo profesionale, duke mos arrestuar punonjësin që goditi me grusht qytetarin. Ajo trupë na turpëron të gjithëve”, u shpreh Hita.
Kreu i Policisë së Shtetit bëri të ditur se që prej pasdites së 30 majit është ngritur një grup i posaçëm hetimor për të verifikuar veprimet dhe mosveprimet gjatë protestës. Paralelisht, sipas tij, Drejtoria e Standardeve Profesionale ka nisur hetim disiplinor për të gjithë zinxhirin komandues të Policisë së Vlorës.
Deklarata e Hitës vjen pas reagimeve të shumta publike dhe politike të shkaktuara nga pamjet e dhunës ndaj protestuesit në Zvërnec, të cilat ndezën debatin mbi rolin e policisë dhe kompanive private të sigurisë gjatë protestave kundër projektit turistik në zonë.
