Prokuroria e Posaçme ka urdhëruar disa kontrolle në kuadër të hetimeve për tjetërsimin e pronave në Zvërnec. Burime pranë SPAK bëjnë me dije se kontrollet po kryhen në Tiranë dhe në Vlorë.
Një prej personave të kontrolluar është Pëllumb Petritaj, ish-avokat, i dënuar më herët për falsifikim dokumentesh pronësie në favor të Artur Shehut. SPAK po heton një skemë të dyshuar të tjetërsimit të pronave në zonën e Zvërnecit, ku është planifikuar ndërtimi i një kompleksi turistik luksoz nga Jared Kushner, dhëndri i Presidentit të SHBA-së, Donald Trump.
Burime bëjnë me dije se Byroja Kombëtare e Hetimit ka ushtruar kontrolle edhe ndaj Leonard Bishës, i njohur me nofkën “Çobo”, i konsideruar si një nga njerëzit më të afërt të Artur Shehut.
Në listën e personave të kontrolluar figuron edhe Redi Struga. Ai është administrator i kompanisë projektuese “InfraKonsult” sh.p.k. Sipas të dhënave publike, Struga shërben përmes kompanisë “Albanian Land Development” si një nga hallkat lidhëse me vëllezërit miliarderë Ramez dhe Mohamad Al-Khayyat nga Katari, të cilët janë pjesë e investimit së bashku me Kushnerin.
Hetimet zhvillohen në një moment kur projekti në Zvërnec ka shkaktuar reagime të forta publike. Prej dy ditësh janë zhvilluar protesta në Vlorë dhe në Tiranë, pasi gjatë një përplasjeje në terren, punonjës të një kompanie private sigurie tërhoqën zvarrë një protestues, pamje që u shpërndanë gjerësisht në rrjetet sociale dhe nxitën reagime të shumta.
