Gjykata e Vlorës caktoi masën e sigurisë “arrest me burg” për Geraldo Bibën, punonjësin e policisë private “Major Security”, i cili u arrestua pas incidentit të ndodhur në Zvërnec më 30 maj, ku tërhoqi zvarrë një qytetar që kishte pretendime për pronësinë në vendin ku pritet të ndërtohet resorti luksoz pas të cilit është Jared Kushner, dhëndri i Donald Trump.
Biba akuzohet për veprat penale “plagosje e lehtë me dashje” dhe “heqje e paligjshme e lirisë”. Bashkë me të janë ndaluar edhe dy punonjës të policisë private të kompanisë “Major Security”, Artur Grami dhe Gazmend Vathi.
Sipas prokurorisë, referuar pamjeve filmike që qarkulluan në media, por edhe dëshmitarëve, i hoqën lirinë shtetasit E.S., duke e tërhequr me forcë dhe nxjerrë jashtë rrethimit të pronës mbi të cilën do të ndërtohet resorti.
Pas ngjarjes në Zvërnec, shoqëria investuese Zvërnec South Adriatic Development njoftoi ndërprerjen e menjëhershme të kontratës me “Major Security” dhe kërkoi ndjesë publike për incidentin. Kompania e cilësoi të papranueshëm çdo veprim që cenon të drejtat e qytetarëve.
Ndërkohë, Drejtori i Përgjithshëm Skënder Hoxha vendosi t’u heqë licencën dy kompanive “Major Security” dhe “Myrto Security 1.3A”.
