Kreu i SPAK, Altin Dumani, në një intervistë për emisionin “3D” në RTSH, ka komentuar përdorimin e të dhënave nga Sky ECC dhe ndikimin e mundshëm të zgjedhjeve në punën e prokurorisë. Dumani theksoi se çështja e vlefshmërisë së provave të marra nga Sky ECC është në shqyrtim nga Gjykata Kushtetuese dhe se SPAK kujdeset që këto të mos jenë prova të vetme.
“Ka një diskutim juridik rreth vlefshmërisë për të dhënat e përfituara prej tij. Ne si institucion kujdesemi që kur përdorim Sky ECC, të mos jetë e vetmja provë. Është një çështje që po shqyrton gjykata. Presim vendimarrjen e saj. Kam disa çështje që kanë përdorur Sky ECC. Iu kam kërkuar avokatëve të sjellin një vendim të një gjykate të rajonit që nuk ka vlefshmëri përdorimi të provave nga Sky ECC”, – u shpreh Dumani.
Ai gjithashtu shtoi se SPAK do të vazhdojë punën e tij pa u ndalur, pavarësisht periudhës së zgjedhjeve, duke theksuar se nuk kanë një "grafik" të caktuar për hetimet. “Ne do hetojmë, ne jemi në punë. Nëse krimi merr pushim gjatë zgjedhjeve?! Ne nuk kemi grafikë”, – tha Dumani.
I pyetur për të ardhmen pas mbarimit të mandatit, ai u shpreh: “Do të vazhdoj normalisht si prokuror”.
