Kreu i SPAK, Altin Dumani, gjatë intervistës për emisionin "3D" në RTSH, komentoi deklaratën e kryeministrit Edi Rama, që e quajti SPAK-un një “Republikë prokurorësh”. Dumani theksoi se SPAK, si çdo institucion tjetër, bazohet në ligj dhe Kushtetutë, dhe çdo veprim i prokurorëve kontrollohet nga gjykatat.
“Nuk kam koment për deklaratat e Kryeministrit. Jemi prokuror. Bazohemi në ligj dhe Kushtetutë. Çdo veprim kontrollohet nga gjykata në tre shkallë” – u shpreh Dumani.
Për arrestimin e kreut të partisë LSI, Ilir Meta, Dumani theksoi se SPAK nuk është përgjegjës për ekzekutimin e masave, por Policia e Shtetit.
“Nuk kam asnjë koment. SPAK nuk ekzekuton masat. Masat e ekzekutimit i bën Policia e Shtetit” – tha Dumani.
Në lidhje me Komisionin “Xhafaj”, Dumani theksoi se vendimi për mos dërgimin e dy prokurorëve ishte marrë në përputhje me nevojat e institucionit. Ai sqaroi se SPAK ka përmbushur detyrimet për integrimin dhe se nuk mund të parashikojë veprimet politike në raport me SPAK-un.
“Nuk quhet refuzim. SPAK-ut ku kërkuan dy prokurorë. Ne vendosëm që nuk duhen dërguar. Komision me objekt të caktuar. SPAK raporton në KLGJ dhe KLP. SPAK i ka përmbushur detyrimet për integrimin. Se çfarë mund të bëjë politika në raport me SPAK nuk e parashikoj dot. Ne jemi të motivuar të punojmë në kushtetutë dhe ligj. BKH ka dërguar ekspertët në Komisionin Xhafaj dhe këtë nuk dua ta komentoj” – u shpreh Dumani.
