Pavarësisht se vendimi i Gjykatës Kushtetuese është marrë që në muajin qershor, qeveria shqiptare pas 5 muajsh ka vendosur që të rikthejë 500 milionë lekë për 6541 tatimpagues të profesioneve të lira. Ky rikthim i fondeve do të realizohet gjatë muajit dhjetor 2024 dhe do të jetë për periudhën Janar-Qershor 2024.
Ministri i Financave, Petrit Malaj, gjatë një konference me Fondin Monetar Ndërkombëtar (FMN) dhe Bankën e Shqipërisë, shpjegoi se ky vendim ka ardhur pas shfuqizimit të një ligji që ishte në fuqi dhe që Gjykata Kushtetuese e shpalli të pavlefshëm.
“Ky proces është trajtuar në mënyrë ligjore, dhe kërkuam një interpretim nga Gjykata Kushtetuese për efektet e ligjit që ishte në fuqi dhe më pas u shfuqizua. Gjykata Kushtetuese nuk dha një vendim të drejtpërdrejtë, por e la të nënkuptohet që efektet e këtij ligji ishin legjitime. Qeveria është angazhuar që të rikthejë këto fonde për profesionistët e lirë,” tha Malaj.
