Kreu i SPAK, Altin Dumani, në një intervistë për emisionin “3D” në RTSH, ka folur për punën e bërë deri më sot nga Prokuroria e Posaçme. Ai theksoi se një nga sukseset kryesore ka qenë goditja e pandëshkueshmërisë.
"Prokurorët flasin me punë, jo me fjalë. Mënyra më e mirë e komunikimit është puna e prokurorit. Puna jonë flet vetë. SPAK ka goditur pandëshkueshmërinë," – u shpreh Dumani.
Ai vuri në dukje edhe se cilët janë funksionarët që janë vendosur para drejtësisë.
“Sa i takon korrupsionit, besoj se SPAK ka demonstruar këto vite se është në gjendje të ushtrojë ndjekjen penale ndaj çdo subjekti pavarësisht pozitës së tij, profilit tij, sado i lartë të jetë, ne po e bëjmë me prova dita-ditës. Ju e dini se SPAK ka ushtruar ndjekjen penale për funksionarë shumë të lartë, të nivelit të mesëm, të nivelit të ulët, ish-gjyqtarë, ish-prokurorë, për kryetarë bashkish, ish-kryetarë bashkish, anëtarë të Kuvendit të Republikës së Shqipërisë, funksionarë shumë të lartë policie”, shpjegoi kreu i SPAK-ut.
Dumani theksoi se SPAK ka goditur organizata kriminale që më parë as mendohej të prekeshin.
“Sa i takon krimit të organizuar ka treguar në këto vite se në bashkëpunim me partnerët ndërkombëtarë të ushtrojë ndjekjen penale ndaj grupeve të strukturuara kriminale dhe organizatave kriminale që më parë as që mendohej të prekeshin por sot është realitet”, tha më tej Dumani.
