Sali Berisha nuk e ka kursyer drejtuesin politik të PD në qarkun e Korçës. Në një intervistë për Syri.tv, drejtuesi i emisionit e ka pyetur për qëndrimin e juristit kryesor të demokratëve për vendimin e Gjykatës Kushtetuese ndaj Sali Berishës. Gjykata Kushtetuese ka lënë në arrest shtëpie Sali Berishën për shkelje të detyrimit për paraqitje.
Ndërsa Ivi Kaso, Sekretari për Çështjet Ligjore në PD, deklaroi në ABC News se: “Po të kishte zbatuar Berisha vendimin e parë, nuk do ishte në arrest shtëpie dhe opozita nuk do ishte në këto kushte.”
Kjo deklaratë e Ivi Kasos ka mërzitur kryetarin e PD, i cili një orë më vonë tha për Syri.tv për Kason se: “Nuk kanë kulturën e mjaftueshme kushtetuese. Ai që e tha këtë e ka gabim. Ivi Kaso e ka shumë gabim.”
Tani pritet që ose Ivi Kaso të kërkojë ndjesë për gabimin apo nxitimin, ose Berisha të nisë një betejë demokratike brenda PD-së për të larguar ata që nuk mendojnë si ai. Sidomos për një çështje të rëndësishme si ajo e arrestit shtëpiak për Sali Berishën, vendim i vulosur mbrëmë nga Gjykata Kushtetuese dhe që ka nxitur reagime të forta nga mbështetësit e kryetarit të PD. Meqë vendimi i Gjykatës Kushtetuese nuk ndryshon, mbetet të shihet se çfarë do të ndodhë me vendimin e Ivi Kasos për të deklaruar diçka që prek direkt Sali Berishën.
