Mbledhja e Komisionit Hetimor për PPP në shëndetësi, ka dështuar sërish, kjo pasi mazhoranca nuk mori pjesë. Nga ana tjetër kryetarja e Komisionit, Albana Vokshi, në pamundësi të plotësimit të kuorumit, e mbylli mbledhjen duke paralajmëruar një konferencë për gazetarët, pasi siç tha ajo në sallën ku mblidhet Komisioni nuk lejohen të mbajnë të deklaratë për mediat.
Ajo u shpreh se kishin pritur rreth 30 minuta në sallë kolegët socialistë, të cilët nuk janë paraqitur në mbledhje.
“Pritëm kolegët që të vinin, rreth 30 minuta. Janë në kryesinë e Kuvendit, por nuk kanë ardhur. Koncesionet në Shëndetësi kanë kushtuar 200 mln euro dëm shtetit. Sot në rendin e ditës kishim kërkuar miratimin e kërkesave për informacion. Është mbledhja e 6 qe bojkotohet nga deputetët e PS-së, pa asnjë arsye legjitime. Duke mos pasur kuorumin e nevojshëm, do të detyrohem ta konsideroj të mbyllur këtë mbledhje, për të ftuar mediat për një prononcim. Deputetëve të Komisionit Hetimor nuk i lejohet të mbajë konferencë në këtë sallë. Kjo është një diskriminim i vazhdueshëm” - tha Vokshi.
Kujtojmë se komisioni hetimor për PPP në shëndetësi, ishin një nga 8 komisionet që ka kërkuar Rithemelimi gjatë protestave që zhvilloi për 3 muaj me rresht në Parlament. Këto komisione më pas u kthyen në plaçkë ujdie me mazhorancën, me pretekstin se Rithemelimi do të ndalte kaosin në Kuvend dhe do të jepte votën për amnistinë, e cila u dha lirinë edhe 100 të dënuarve nga GKKO, ndërsa nga ana tjetër mazhoranca pranoi 2 komisione të kërkuara nga opozita dhe që sot as nuk i përfillin më, duke mos u paraqitur as në mbledhje.
