Ndërron jetë në spitalin e Shkodrës, Bashkim Basha, duke çuar në 4 numrin e viktimave të masakrës së Dobraçit në Shkodër.
Bashkim Basha po udhëtonte me gruan Flutura Basha me motorr kur automjeti që drejtohej nga Hamza Lici i përplasi. Lici po tentonte t’i shmangej breshërisë së plumbave të kallashnikovit që po derdheshin mbi makinën e tij.
Lici mbeti i vrarë në vend, ndërsa nga aksidenti ndërroi jetë dhe Flutura Basha.
Arlind Bushati që udhëtonte me Licin ndërroi jetë disa orë më vonë në spital. Ndërsa Bashkim Basha mbylli sytë në reanimacionin e spitalit të Shkodrës këtë mëngjes.
Atentati dyshohet të ketë si motiv perplasjen mes grupeve kriminale Lici e Bajri në Shkodër. Hamza Lici është vëllai i të shumëkërkuarit Ibrahim Lici që njihet si kundërshtar i Bajrave.
Njoftimi i policisë:
Në vijim të informacionit të dhënë më 30.10.2024, për ngjarjen e ndodhur në aksin rrugor “Shkodër-Koplik”, në Dobraç, ju informojmë se ka humbur jetën në Spitalin Rajonal Shkodër edhe shtetasi B.B., 67 vjeç, drejtuesi i motomjetit që u përplas nga automjeti i shtetasve H. L dhe A. B, të cilët humbën jetën si pasojë e plagëve nga të shtënat me armë zjarri nga persona ende të paidentifikuar.
Grupi i posaçëm hetimor në drejtimin e Prokurorisë së Shkodrës, po vijon intensivisht hetimet për zbardhjen dhe dokumentimin ligjor të ngjarjes, identifikimin dhe kapjen e autorëve.
