Policia ka vënë në pranga një 41-vjeçar të identifikuar si Mandi Qori, i cili ishte në kërkim për akuzën e tentativës së vrasjes ndaj shtetasit Eri Driza. Sipas njoftimit zyrtar, arrestimi i Qorit u bë gjatë kontrolleve të zhvilluara në rrugën “Tre Dëshmorët” në Tiranë.
Ngjarja ka ndodhur para pak kohësh, kur Qori ka goditur me thikë shtetasin Driza, duke i shkaktuar atij dëmtime të rënda. Për këtë akt, Gjykata e Shkallës së Parë e Juridiksionit të Përgjithshëm në Tiranë kishte lëshuar masën e sigurimit “Arrest në burg” për Qorin, i cili tashmë ndodhet në paraburgim.
Njoftimi
Finalizohet operacioni policor i koduar Wanted 3″, nga Komisariati i Policisë Nr. 6 dhe Seksioni për Hetimin e Krimeve të Rënda Ndaj Personit.
Kapet dhe ndalohet një shtetas i shpallur në kërkim për vrasje të mbetur në tentativë dhe mbajtje pa leje të armëve të ftohta.
Shërbimet e Komisariatit të Policisë Nr. 6 dhe ato të Seksionit për Hetimin e Krimeve të Rënda Ndaj Personit, bazuar në informacionet e siguruara për vendndodhjen e një shtetasi në kërkim, kanë intensifikuar kontrollet për kapjen dhe vënien e tij përpara përgjegjësisë ligjore.
Gjatë kontrolleve, në rrugën “Tre Dëshmorët”, u kap shtetasi M. Q., 41 vjeç, banues në Tiranë, i cili ishte shpallur në kërkim pasi Gjykata e Shkallës së Parë e Juridiksionit të Përgjithshëm Tiranë, i ka caktuar masën e sigurimit personal “Arrest në burg”, për veprat penale “Vrasja me dashje” mbetur në tentativë dhe “Prodhimi dhe mbajtja pa leje e armëve të ftohta”.
Ky shtetas, më datë 19.09.2024, në zonën e Yzberishtit, pas një konflikti për motive të dobëta, ka goditur disa herë me mjet prerës (thikë) shtetasin E. D.
Materialet i kaluan Prokurorisë.
