Kryetari i Bashkisë Shkodër, Benet Beci, ka njoftuar se të hënën në Shkodër do të zhvillohet një takim mes Kryeministrit dhe socialistëve të qytetit, në Kalanë e Rozafës. Sipas zotit Beci, qyteti po përjeton një "transformim dhe vëmendje të shtuar nga investimet". Por siç duket, transformimi i parë ka nisur nga liria e shprehjes në rrjetet sociale. Kryebashkiaku ka vendosur t'u bëjë "block" komenteve të qytetarëve poshtë postimit të tij.
"Të hënën, Shkodra pret Kryeministrin e Shqipërisë... në Kalanë e Rozafës do të zhvillohet një takim me socialistët e Shkodrës, për të folur për rrugën e nisur dhe sfidat që mbeten përpara”, shkruan Beci.
Pra, ndërsa kryebashkiaku flet për "sfidat që mbeten përpara", sfida e parë që dështoi ishte ajo e ballafaqimit me mendimet e vetë shkodranëve. Ndoshta zyra e marrëdhënieve me publikun në bashki ka menduar se Rozafa ka pasur mure të larta për t'u mbrojtur nga armiqtë, kështu që edhe Beci ka nevojë për një "mur digjital" për t'u mbrojtur nga... komentet e qytetarëve të tij.
