Pas Flamur Nokës, edhe Ervin Salianji ka paralajmëruar se nëse Kuvendi i heq mandatin Sali Berishës, i cili ndodhet në masën e arrestit të shtëpisë që prej 30 dhjetorit, atëherë do të çonte në një përplasje të fortë me mazhorancën.
Në një intervistë për mediat, Salianji u shpreh se nëse shumica ndërmerr një akt të tillë do të çonte në ekstrem përplasjen mes zgjedhësve të Berishës dhe kundërshtarëve politik të tij.
“Kushtet e zotit Berisha nuk jemi në kushtet që parashikon Kushtetuta për mbarimin e mandatit. Zoti Berisha nuk po mungon pa arsye në Kuvend për 6 muaj. I është kufizuar liria me një vendimmarrje, në këndvështrimin tim të padrejtë” - theksoi ai.
Salianji gjithashtu foli edhe për refuzimin e opozitës që të marrë pjesë në komisionet parëlamentare të mazhorancës atë të dezinformimit si edhe të luftës kundër korrupsionit. Sipas tij, me këto nisma, shumica kërkon të shtrijë kontrollin ndaj institucioneve.
“PS së pari nuk e shtrin dorën përveç rasteve kur do të vjedhë ndonjë gjë dhe ky është rasti ku PS po kërkon që përmes krijimit të komisioneve, në rastin tjetër të kufizojë lirinë e shprehjes te portale apo media kritike dhe në një rast të kufizojë të drejtat që kanë të bëjnë me ushtrimin e të drejtave kushtetuese të organeve të pavarura”, tha Salianji.
