SPAK paraqet prova të reja në procesin ndaj Festim Bexhdilit, kopshtarit të Golden Resort në pronësi të Altin Hajrit, nga garazhi i të cilit u zhduk trupi i pajetë i Jan Prengës në 2020. Bëhet fjalë për komunikimet në aplikacionin e koduar Sky ECC mes të pandehurve, Dritan alias Gramoz Rexhepi, Gentian Doci Funiqi dhe Altin Hajri. Avokati kërkoi kohë që të njihet me këto prova të reja dhe më pas të mbajë qëndrimin e tij.
Bexhdili u dënua me burgim të përjetshëm për akuzën e rrëmbimit dhe zhdukjes së Jan Prengës, por Gjykata e Lartë e ktheu dosjen për rigjykim në Apel. Për rrëmbimin e zhdukjen e babait të tre fëmijëve janë duke u gjykuar në dy procese të ndara, Altin Hajri dhe në një tjetër, Dritan Rexhepi, Gentian Doci Funiqi, Martin Bleta, Artan Docaj, Korado Gështenja dhe Aldo Majnishta.
Jan Prenga u rrëmbye në 2020 në Kamzë nga 4 persona, pasi në Britaninë e Madhe vëllai i tij kishte grabitur një sasi të madhe droge në një port atje.
Vëllai i pengut ktheu një sasi të madhe droge dhe pagoi shumë para, por trupi i Jan Prengës nuk u kthye tek familja. Kërkimet e policisë për gjetjen e trupit të Prengës nuk kanë dhënë rezultat.
