Këshilli i Lartë i Prokurorisë do të diskutojë në mbledhjen e kësaj të marte një shkresë të dërguar nga Aida Hajnaj Veizaj, drejtuese e Byrosë Kombëtare të Hetimit. Hajnaj përfundon mandatin e saj më 31 gusht 2025, ndërkohë që SPAK ka hapur garën për zgjedhjen e pasuesit të saj.
Në ligj përdoret termi “riemërim”, çka duket se ka krijuar një ngërç juridik dhe, sipas burimeve, zonja Hajnaj pretendon të ketë të drejtën për një mandat të dytë. Megjithatë, ligji parashikon që drejtuesi i BKH-së të zgjidhet përmes një procesi të strukturuar, ku kandidatët kalojnë disa faza vlerësimi.
SPAK ka hapur zyrtarisht garën për drejtuesin e ri të BKH-së dhe afati për dorëzimin e dokumentacionit për kandidatët përfundon më 8 maj. Komisioni përzgjedhës përbëhet nga drejtuesi i SPAK, Altin Dumani, dhe prokurorët e posaçëm Arben Kraja dhe Behar Dibra.
