Kryetari i Partisë Mundësia, Agron Shehaj, ka reaguar pas incidentit të regjistruar në Kuvend, ku ai “rrëmbeu” dokumentin e marrëveshjes me Shtetet e Bashkuara për huanë prej 302 milionë dollarësh dhe u largua me vrap nga salla.
Shehaj justifikoi veprimin e tij duke thënë se e mori dokumentin pasi kryetari i Kuvendit, Niko Peleshi, u kishte bërë me dije deputetëve se marrëveshja mund të merrej për lexim në ambientet pranë sallës së seancave.
"Ju e patë vetë që kryeparlamentari u tha deputetëve që po ankoheshin se mund ta gjenin dokumentin te zyra këtu afër. Nuk tha që nuk mund ta merrje. Unë shkova, firmosa dokumentin për mospërndarjen e marrëveshjes dhe u largova. Ne na kërkojnë shumë gjëra në Kuvend, madje na kërkojnë të mos shkojmë kur është Rama", deklaroi Shehaj.
Nga frika se mund të merren masa ndaj tij për shkak se veprimi është në shkelje të ligjit, Shehaj tha se dokumenti nuk ka dalë jashtë ambienteve të Kuvendit dhe se më pas e ka dorëzuar sërish aty ku e kishte marrë.
"Marrëveshjen e dorëzova sërish aty ku e mora. Marrëveshja nuk ka dalë nga Kuvendi i Shqipërisë. E mora sepse më takonte. Ajo është një marrëveshje sekrete dhe nuk jam i autorizuar të jap detaje", u shpreh kreu i Partisë Mundësia.
Në fund, Shehaj ritheksoi se forca politike që ai drejton e mbështet në parim marrëveshjen me SHBA-në, por kundërshton procedurën e ndjekur nga Kuvendi për miratimin e saj.
Megjithatë, nga ana tjetër Grupi Parlamentar i Partisë Socialiste i ka kërkuar Kryetarit të Kuvendit dhe Sekretariatit për Procedurat, Votimet dhe Etikën marrjen e një mase disiplinore ndaj deputetit Agron Shehaj. Socialistët kanë kërkuar gjithashtu që rasti të referohet në SPAK, për vlerësimin e mëtejshëm të veprimeve të kryera gjatë seancës plenare.
