VNA ka siguruar dokumentin zyrtar të vendimit të Këshillit të Ministrave, firmosur nga Edi Rama tre ditë më parë, i cili zbardh arsyen kryesore prapa mbledhjes së sotme të Kuvendit në seancë plenare.
Qeveria shqiptare i ka dërguar Parlamentit me procedurë të përshpejtuar projektligjin për ratifikimin e një marrëveshjeje për huazim të drejtpërdrejtë ndërmjet Republikës së Shqipërisë (përfaqësuar nga Ministria e Financave) dhe Shteteve të Bashkuara të Amerikës. Marrëveshja po realizohet përmes Agjencisë së Bashkëpunimit për Sigurinë e Mbrojtjes (DSCA), në kuadër të programit amerikan për Financimin e Jashtëm Ushtarak (FMF).
Nisma do të prezantohet sot në Kuvend, i cili gjasme po mblidhet për disa anëtarë zëvendësues në Komisione.
Marrëveshje direkte me SHBA: Nisma përfshin një hua strategjike për sigurinë ushtarake të vendit, e dërguar për shqyrtim urgjent në komisionet parlamentare.
Trajtimi në komisione: Relacioni shoqërues dhe detajet teknike mbahen sekret, do të shqyrtohen në Komisionin e Sigurisë Kombëtare në kushte konfidenciale, nga deputetë të cilët zotërojnë certifikatë sigurisë.
Megjithëkëtë., VNA ka mësuar në burime jo zyrtare, se shifra e huas në fushën e sigurisë shkon në 600 mln euro.
Vendimi mban nënshkrimin e Kryeministrit Edi Rama dhe Ministrit të Financave, Petrit Malaj, ndërsa i është përcjellë Kuvendit të drejtuar nga Niko Peleshi.
Projektligji parashikohet të kalojë me shpejtësi të lartë procedurale në parlament dhe hyn në fuqi 15 ditë pas botimit në Fletoren Zyrtare.
