Protesta kundër qeverisë hyri në ditën e saj të 56-të, me protestuesit që u mblodhën sërish në sheshin “Skënderbej” dhe marshuan drejt Kryeministrisë, duke përsëritur kërkesën për dorëheqjen e kryeministrit Edi Rama dhe duke mbajtur të njëjtat qëndrime kundër klasës politike. Gjatë marshimit u dëgjuan sërish thirrjet “Rama jep dorëheqjen”, “Revolucion”, si edhe slogani që është bërë simbol i kësaj lëvizjeje: “Rama në burg, Berisha në burg”.
Në qendër të protestës kësaj radhe ishte dokumenti strategjik “Besa”, i prezantuar një ditë më parë nga kryeministri Rama. Dokumenti parashikon që brenda 90 ditësh të zhvillohen dëgjesa publike, përfshirë edhe me grupet e protestuesve, si dhe të bëhet transparencë mbi dokumentacionin dhe një vlerësim paraprak për projektin e Zvërnecit, përpara se qeveria të marrë një vendim përfundimtar.
Protestuesit e refuzuan këtë qasje, duke deklaruar se dokumenti nuk i përgjigjet kërkesave të tyre dhe se synon të zbehë protestën, jo të adresojë problemin. Në fjalimet e mbajtura para Kryeministrisë, ata kujtuan deklaratat e mëparshme të kryeministrit ndaj tyre, duke theksuar se pasi i kishte etiketuar si “agjentë”, “terroristë”, “sorra e korba”, tashmë po u kërkonte “besën”.
“Besa nuk jepet te mashtruesit dhe tek ata që na hanë në besë. Ti na ke quajtur agjentë, terroristë e sorra, ndërsa sot kërkon besën tonë. Kërkojmë vetëm një gjë: dorëheqjen tënde pa kushte”, u shprehën disa prej protestuesve, duke e cilësuar “Besën” një përpjekje politike për të ndryshuar fokusin e debatit.
Ata këmbëngulën se protesta mbetet kundër sistemit politik dhe jo vetëm kundër një projekti të veçantë, ndërsa përsëritën akuzat se qeveria ka zgjedhur interesat e oligarkëve dhe jo të qytetarëve.
Në përfundim të tubimit, organizatorët paralajmëruan se protesta e radhës do të zhvillohet të hënën para Kuvendit, gjatë seancës parlamentare, ku pritet të rikthehen edhe aktet simbolike të kundërshtimit. Ata deklaruan se do t’i presin deputetët me vezë, duke ironizuar se synojnë t’u bëjnë “omletë” ligjvënësve, ndërsa kërkuan edhe lirimin e dy protestuesve të arrestuar pas përplasjeve të javës së kaluar pranë Parlamentit.
Me hyrjen në ditën e 56-të, protesta vijon të ruajë kërkesën e saj kryesore për largimin e kryeministrit, ndërsa përplasja mes qeverisë dhe organizatorëve po zhvendoset gjithnjë e më shumë edhe në debatin mbi dokumentin “Besa”, i cili pritet të ketë provën e parë konkrete në procesin e konsultimeve për projektin e Zvërnecit.
