Kryetari i Partisë Demokratike, Sali Berisha, zgjodhi të mos i përgjigjej drejtpërdrejt një pyetjeje lidhur me zhvillimet e fundit që përfshijnë biznesmenin Klodian Allajbeu dhe dyshimet për korrupsion klientelist në sektorin e shëndetësisë.
Një qytetare e pyeti Berishën:
“Doktor, zhvillimet e fundit rreth hetimeve që lidhen me Klodian Allajbeun kanë kthyer në qendër të vëmendjes dyshimet për korrupsion klientelist në sektorin e shëndetësisë, plaga më e madhe për shqiptarët. Do të ishte me interes të dëgjonim vlerësimin dhe qëndrimin tuaj politik për këtë çështje, si dhe çfarë zgjidhjesh propozon PD për t’i dhënë fund lidhjeve klienteliste mes biznesit dhe pushtetit. PD është e vetmja që e denoncon këtë gjë, ndërkohë që shumica e mediave dhe portaleve hesht dhe nuk e publikon këtë lajm.”
Në përgjigjen e tij, Berisha nuk komentoi konkretisht rastin e Allajbeut, por e zhvendosi diskutimin te korrupsioni në shëndetësi në përgjithësi.
“E vërteta është që vjedhjet në sistemin e shëndetësisë janë vjedhjet me koston më të dhimbshme, sepse kushtojnë jetë njerëzore. Ato bazohen në favorizimin e oligarkëve të fushës së shëndetësisë, të gjitha në kurriz të të sëmurëve shqiptarë dhe të pasurimit të zyrtarëve të kësaj fushe.”
Më tej, kreu i PD-së krahasoi situatën me periudhën kur ishte në pushtet, duke pranuar se edhe atëherë kishte korrupsion, por duke argumentuar se sot qytetarët paguajnë shumë më tepër nga xhepi për shërbimet shëndetësore.
Berisha riktheu në vëmendje edhe koncesionin e sterilizimit, për të cilin akuzoi Edi Ramën dhe ish-ministrin Ilir Beqaj.
“Sterilizimi, për të cilin spitalet paguanin, po e marr në mënyrë arbitrare, 1 lekë, u privatizua nga Edi Rama dhe ministri i tij Beqaj, duke e rritur çmimin, sipas ekspertëve, 84 herë. Paratë që përdoreshin për ilaçe dhe nevoja të tjera të të sëmurëve përfunduan në këtë koncesion.”
Megjithatë, pavarësisht se pyetja ishte specifike për Klodian Allajbeun, Berisha nuk dha një përgjigje të drejtpërdrejtë për këtë rast.
Kjo bie në kontrast me qëndrimin publik të Partisë Demokratike vetëm pak kohë më parë. Sekretari i Përgjithshëm i PD-së, Flamur Noka, ka publikuar në profilin e tij në Facebook akuza të drejtpërdrejta ndaj Klodian Allajbeut, duke e paraqitur si një nga përfituesit e skemave klienteliste në shëndetësi. Deri në këtë moment, ato postime vijojnë të jenë ende publike.
