Erion Braçe ka reaguar pas lajmeve që folën për një përplasje mes tij dhe kryeministrit Edi Rama në mbledhjen e grupit parlamentar të Partisë Socialiste.
Në një deklaratë publike, deputeti socialist mohoi versionet që qarkulluan në media dhe e zhvendosi theksin te një tjetër çështje: nxjerrjen jashtë të diskutimeve të mbledhjes.
Braçe e krahasoi publikimin e diskutimeve të brendshme me një “vrasje me pagesë” politike, duke thënë se informacionet janë transformuar me qëllim linçimin e kolegëve.
“Dje para se të nisja të flisja, u kërkova kolegëve të mos nxirrnin përjashta asgjë nga ato që unë do flisja aty. Ja që ndodhi kjo që lexova, madje edhe e transformuar”, u shpreh ai.
Deputeti kujtoi gjithashtu se në mbledhjen e djeshme ishte marrë angazhimi që të identifikohej dhe të ndëshkohej ai që nxjerr diskutimet e brendshme të grupit parlamentar, duke shtuar se pret që ky premtim të mbahet.
Braçe mohoi gjithashtu pretendimet se ishte nxjerrë jashtë mbledhjes, duke sqaruar se ishte ulur pasi kishte përfunduar fjalën dhe më pas ishte larguar me dëshirën e tij.
Nëse deklarata lexohet me kujdes, duket se zemërimi i Braçes nuk drejtohet aq ndaj mënyrës se si u zhvillua debati me Edi Ramën, sa ndaj atyre që, sipas tij, nxorën dhe deformuan diskutimet e mbledhjes së socialistëve. Me fjalë të tjera, shënjestra e tij nuk duket të jetë “shefi i madh”, por burimi që çoi debatet e mbyllura në hapësirën publike.
