Demokratët Europianë kanë reaguar përmes një postimi në rrjetet sociale në lidhje me protestat e fundit në Shqipëri, duke ngritur akuza ndaj qeverisë së kryeministrit Edi Rama për mënyrën e menaxhimit të situatës dhe përdorimin e forcës nga autoritetet.
Në fokus të reagimit është vendosur një moment gjatë protestës para Kuvendit, ku shfaqet një nënë duke përqafuar djalin e saj autik. Sipas Demokratëve Europianë, i riu është prekur nga spraji i piperit i përdorur nga policia gjatë përplasjes me protestuesit.
Sipas kësaj force politike, pamjet përbëjnë një simbol të mënyrës se si, sipas tyre, institucionet shtetërore iu përgjigjën qytetarëve që shprehën pakënaqësi përmes protestës.
Në reagimin e tyre, Demokratët Europianë theksojnë se Shqipëria ka nevojë për më shumë llogaridhënie demokratike, mbikëqyrje të pavarur dhe garantimin e të drejtës për protestë paqësore. Postimi shoqërohet me mesazhin: “Shqipëria reziston. Rama përgjigjet me represion.”
