SPAK pritet të zgjasë edhe më 3 muaj të tjerë afatet e hetimit për ish-zv.kryeministren Belinda Balluku, si dhe ish-vartësit e saj, të cilët po hetohen për abuzime me tenderat e rrugëve. Ndërsa për ish-ministren e Infrastrukturës dhe Energjisë, pozita e saj është rënduar edhe më shumë, pasi po hetohet edhe për korrupsion e pastrim parash.
Burime pranë Prokurorisë së Posaçme bëjnë me dije se të mërkurën prokurorët e Posaçëm u kanë dërguar fletëthirrje për t’u paraqitur Gentian Gjylit, ish-drejtorit të Autoritetit Rrugor Shqiptar, dhe Erald Elezit, ish-kreut të Korporatës Elektroenergjitike Shqiptare, të cilët janë të pandehur bashkë me Ballukun lidhur me abuzimet për tenderin për ndërtimin e tunelit të Llogarasë.
“Kemi ende veprime hetimore për të kryer,” tha një burim pranë SPAK, “ndaj afati i hetimeve është vendosur të shtyhet edhe me 3 muaj të tjerë, sipas ligjit.”
Çështja e Belinda Ballukut shpërtheu në tetor të vitit të kaluar dhe fillimisht ndaj saj u caktuan dy masa sigurie, që janë ende në fuqi: ndalim për të dalë jashtë vendit dhe pezullim nga ushtrimi i funksioneve për akuzën e shkeljes së barazisë në tendera, kryer në bashkëpunim në disa episode.
Ndërsa kërkesa e SPAK për leje për ta arrestuar Ballukun u rrëzua me shumicë votash nga maxhoranca socialiste. Pas rrëzimit të kërkesës, prokurorët ngritën akuza të reja për Ballukun, si korrupsion e pastrim parash gjatë kohës që drejtonte Albcontrol.
