Tensione në protestën para Kuvendit, policia shoqëron organizatorin Arben Kola dhe disa protestues
Protesta e nisur që prej orës 08:30 të mëngjesit të së hënës para Kuvendit është shoqëruar me tensione dhe përplasje mes protestuesve dhe forcave të policisë.
Sipas informacioneve të deritanishme, policia ka shoqëruar pesë persona, mes tyre edhe një nga organizatorët e protestës, Arben Kola. Ai u ndalua pasi tentoi të çante kordonin e policisë, ndërsa në pamje shihet duke u mbajtur nga katër efektivë, ndërkohë që kishte ende megafonin në dorë.
Gjatë protestës, pjesëmarrësit kanë tentuar t’i afrohen Parlamentit duke lëvizur në rrugët përreth, por janë penguar nga kordonët policorë të vendosur në zonë.
Situata u tensionua më tej kur protestuesit hodhën vezë në drejtim të efektivëve, ndërsa policia përdori në disa momente spraj me lëndë irrituese për të kontrolluar turmën.
Përplasjet kanë vijuar edhe pranë Xhamisë së Namazgjasë, ndërsa situata në zonën përreth Kuvendit mbetet e tensionuar.
