Policia e Shtetit ka shoqëruar mbi 50 persona dhe ka arrestuar dy qytetarë pas përplasjeve fizike gjatë protestës së djeshme të organizuar nga Partia Demokratike dhe opozita. Deputetët organizatorë janë proceduar në gjendje të lirë, ndërsa protestat e opozitës zgjatën rreth tre orë duke bllokuar disa akse kryesore në kryeqytet.
Në flagrancë u arrestuan shtetasit S. N., banues në Tiranë, dhe I. H., 53 vjeç, për veprat penale “Pengimi i qarkullimit të mjeteve të transportit” dhe “Kundërshtimi i punonjësit të policisë së rendit publik”. I. H. gjithashtu u procedua për “Prishja e rendit dhe qetësisë publike” dhe “Dëmtime të tjera me dashje”, pasi ka bllokuar një automjet dhe ka goditur drejtuesin e tij.
Protesta, e cila u zhvillua në disa pika të ndryshme të Tiranës, u shoqërua me tensione të shumta. Në zonën e Rrugës së Elbasanit, deputeti Flamur Noka u përfshi në një incident duke goditur një efektiv policie. Përplasjet më të ashpra u raportuan në sheshin “Wilson”, ku policia përdori autobotin me ujë për të shpërndarë protestuesit. Ndërkohë, në zonën e Zogut të Zi, trafiku u paralizua për më shumë se një orë, duke shkaktuar tensione mes qytetarëve dhe policisë, ndërsa përplasje pati edhe pranë Pallatit me Shigjeta.
Shoqërimet e para nisën menjëherë pas përfundimit të protestës, ndërsa policia vijon hetimet për incidentet dhe aktet e dhunshme gjatë tubimit.
