Gjykata e Posaçme Kundër Korrupsionit dhe Krimit të Organizuar (GJKKO) ka vendosur sot heqjen e masës së arrestit shtëpiak ndaj ish-kryeministrit dhe kreut të Partisë Demokratike, Sali Berisha. Lajmin e konfirmoi avokati i tij, Genc Gjokutaj, i cili deklaroi se Berisha tashmë është i lirë dhe pa asnjë masë sigurimi ndaj tij.
“Vendimi është absolutisht i ekzekutueshëm. Nga sot, z. Berisha është i lirë dhe pa asnjë masë sigurimi,” tha Gjokutaj.
Nuk mungoi një mesazh për Prokurorinë e Posaçme. “SPAK-u le të bëjë çfarë të dojë, SPAK-u duhet të ulë kokën dhe të shikojë se çfarë ka bërë, të kthehet në retrospektivë. I ka hipur një kali së prapthi, do të shikoni më tutje se çfarë do të ndodhë. Vendimi absolutisht është i ekzekutueshëm që nga sot. Sot është i lirë. Mos u mërzisni pse u lirua”, tha Gjokutaj.
Avokati sqaroi se Prokuroria kishte kërkuar që Berisha të mbetej në arrest shtëpie, por Gjykata konstatoi se nuk ekzistonin më kushtet dhe kriteret për vijimin e kësaj mase. Ai shtoi se procesi ndaj Berishës mbetet ende në fazën e hetimeve paraprake.
“Mos harroni që jemi në fazën e kërkimit paraprak. Gjykata Kushtetuese dhe qëndrimi i Strasburgut kanë një rol determinant në këtë proces, i cili, sipas nesh, është kryekëput politik,” përfundoi Gjokutaj.
