Disa ditë pasi blloku i tij CDU/CSU siguroi fitoren në zgjedhjet kombëtare, lideri i CDU/CSU, Friedrich Merz, ka zhvilluar mbrëmjen e së mërkurës një vizitë të papritur në Paris, për të takuar presidentin francez Emmanuel Macron.
Vizita, e raportuar nga ”Politico” dhe tabloidi gjerman ”Bild”, pritet të përfshijë diskutime mbi ndryshimin e fundit në politikën e SHBA për luftën në Ukrainë si dhe mbrojtjen evropiane.
Udhëtimi shënon daljen e parë jashtë vendit të Merz që nga aleanca e tij e qendrës së djathtë, CDU dhe CSU, fitoi zgjedhjet e së dielës me 28,5% të votave.
Negociatat për të formuar një koalicion me socialdemokratët (SPD) e kancelarit në largim, Olaf Scholz do të fillojnë në një kohë kritike për Evropën, me liderët e shqetësuar se presidenti i SHBA Donald Trump mund të përfundojë një marrëveshje paqeje me Rusinë pa përfshirjen evropiane.
Macron vizitoi Shtëpinë e Bardhë të hënën, duke këmbëngulur se asnjë marrëveshje nuk mund të arrihet pa miratimin e Ukrainës.
Presidenti francez informoi udhëheqësit e BE-së për vizitën e tij në një video-telefonatë të mërkurën.
Udhëheqësit e BE-së do të mblidhen në Bruksel më 6 mars për të diskutuar mbi zhvillimet e fundit.
