Policia italiane ka shkatërruar një organizatë kriminale të trafikut ndërkombëtar të drogës që operonte në aksin Spanjë–Shqipëri–Itali, duke finalizuar 9 arrestime dhe sekuestruar mbi 110 kilogramë kokainë dhe kanabis.
Operacioni u zhvillua nga Guardia di Finanza e Leçes, e cila njoftoi përfundimin e hetimeve paraprake ndaj nëntë personave, dy prej tyre me origjinë nga Salento dhe shtatë shtetas marokenë, të vendosur në provincat e Leçes, Bolonjës dhe Modenës.
Sipas hetimeve të GICO-s dhe njësisë PEF të Leçes, grupi kriminal dyshohet se ishte i përfshirë në trafikun dhe shpërndarjen ndërkombëtare të lëndëve narkotike, me një rrjet që shtrihej edhe në zonën e Napolit. Droga, sipas autoriteteve, transportohej nga Spanja përmes Shqipërisë dhe më pas mbërrinte në Salento.
Gjatë operacionit në provincën e Leçes, u sekuestruan mbi 110 kilogramë drogë, përfshirë kokainë dhe kanabis, si dhe katër automjete. Shtatë persona u arrestuan në flagrancë gjatë transportit të lëndës narkotike, ndërsa ata nuk përfshihen në listën e personave ndaj të cilëve janë mbyllur hetimet.
Autoritetet italiane bëjnë të ditur se droga e sekuestruar, nëse do të hidhej në treg, do të sillte përfitime të paligjshme rreth 500 mijë euro për grupet kriminale.
Sipas Guardia di Finanza, ky nuk është një rast i izoluar, pasi që në tetor 2025, gjatë operacionit “Gioele”, autoritetet kishin goditur më parë të njëjtën rrugë të trafikut ndërkombëtar të drogës.
