Një incident i rëndë është regjistruar në qytetin e Vlorës, ku një oficer i Policisë Kufitare, jashtë orarit të shërbimit dhe me uniformë, ka dhunuar fizikisht një 18-vjeçar që punonte si kamarier në një lokal në lagjen “Pavarësia 2”. Sipas dëshmive, i riu u godit vetëm pse kishte ngatërruar porosinë në tavolinë, duke u përballur më pas me agresion të paprovokuar nga ana e efektivit policor, Ardian Isufi.
Ndërkohë, në njoftimin zyrtar të shpërndarë nga Policia e Shtetit, drejtori i përgjithshëm Ilir Proda deklaron se “oficeri është përfshirë në një konflikt fizik”, duke minimizuar ngjarjen dhe shmangur përshkrimin real të dhunës së ushtruar ndaj një qytetari të mitur. Për më tepër, Proda ka urdhëruar pezullimin e përkohshëm të efektivit, por nuk ka kërkuar asnjë ndjesë publike për dhunën e ushtruar nga një përfaqësues i shtetit ndaj një të riu që ndodhej në punë.
E para, zoti Proda, nuk është e vërtetë që Ardian Isufi është përfshirë në një konflikt siç e shkuani ju në njoftim. Ai ka sulmuar fizikisht një 18-vjeçar që punonte si kamarier. Vartësi juaj ka dhunuar pa asnjë arsye një të ri vetëm se iu prish qejfi nga shërbimi.
E dyta, zoti Proda, ju si drejtues “madhështor” që e përcaktoni veten në njoftim duhet të jeni së paku qytetar e t’i kërkoni ndjesë 18-vjeçarit që është dhunuar pikërisht nga një njeri me uniformë. Si drejtues, ju mbani përgjegjësi për çdo akt të shëmtuar të uniformave blu. Në çdo vend dhe mendje normale të riun e dhunuar duhet ta ruante nga padrejtësitë dhe dhuna pikërisht dhunuesi i sotëm dhe ju.
Se treti, zoti Proda, arroganca juaj në çdo dalje publike, përfshirë dhe reagimin e sotëm, është modeli që ndjekin vartësit tuaj. Duke nisur që nga moskërkesa e ndjesës e deri te përdorimi i uniformës.
Ngjarja në Vlorë nuk është vetëm një akt dhune ndaj një të riu, por edhe një provë e qartë e dështimit institucional për të mbrojtur qytetarin nga shteti. Reagimit të sotëm të drejtorit të Policisë së Shtetit i mungonte vetëm fjalia spiropaliane “ ngjarje të tilla ndodhin kudo në botë. Me to bëhen dhe filma”
